2020年，算唔算係大家用腦最多嘅一年？
抗疫情：全城齊搶防疫用品，上網店、排街邊、托朋友、Facebook留言「2盒，thx」，明知俾friend笑無知，但命仔比面子緊要，點都要一試。
畢業生：HR每年都話市道差，今年終於堅係差。搵工難，畢業生搵工更難，被標籤為社會放棄嘅新一代，絞盡腦汁寫CV，影張靚靚見工相，只為搏僱主一笑，得到一次面試機會。
打工仔：平時返工都係齋企，自由行就自動送錢埋嚟。一次疫情來襲，想搵隻蚊之仔飛過都難，放完no paid leave，再被迫食無情雞。一家幾口有大有細，只好馬死落地行，揸uber送外賣做代購，叫做勉強頂住先。
做生意：專做本地人生意，應該無死？錯，戲院、美容院、Party room，一律停停停！好在轉身夠快，做開堂食嘅，轉為專送外賣；做地舖生意嘅，開live做棟篤笑賣貨；面對面教書嘅，改為彈性時間網上教學。關關難過關關過，仲未死得住。
為人父母：學校宣布停課，工人姐姐未返到，自己一個單打化骨龍。又怕落街多病菌，又驚仔女學習進度落後，化身多功能父母，準備健康三餐、督促做功課、扮鬼扮馬陪玩、講故事氹訓覺。結果由朝到晚無得抖，WFH仲忙過正常返工。不過為下一代著想，自己幾辛苦都無計。
2020年係好特別嘅一年，全球進入大洗牌時代，唔淨止經濟模式轉變，仲推翻我哋舊有思維模式，徹底改變生活習慣。肺炎疫情，毋庸置疑絕對係bad thing，但第二個角度睇，換嚟全民覺醒，衛生意識提高，各行各業數碼化，加速新一輪科技革命，又未嘗唔係帶來good change。始終人逗留喺comfort zone太耐，就唔會諗點樣去改變、進步。喺呢個時勢，要敢變敢想先係出路，唔會被時代所淘汰！
Search